Арқалықта екі жүзден астам адам қаланы тазартуға шықты

 Арқалық қаласында «Жасыл ел» жасақтары мен жергілікті тұрғындар бірлесіп, қаланың бірнеше бөлігінде ауқымды тазалық жұмыстарын жүргізді. Игі іске 200-ден астам адам қатысып, саябақтар мен скверлерді, аулалар мен көшелерді қоқыстан тазартты.

Бұл шаралар «Таза Қазақстан» республикалық экологиялық акциясы аясында ұйымдастырылды. Қала мен оған қарасты 12 елді мекеннен 60 мың текше метрден астам тұрмыстық және құрылыс қалдықтары шығарылды.

Арқалық қалалық тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің бас маманы Абай Бірахметовтің айтуынша, қалада абаттандыру жұмыстары да жүйелі түрде жүргізілуде.

– Облыстық бюджет есебінен 50 миллион теңгеге 4 мың түп ағаш көшеті отырғызылды. Бұған қоса, демеушілер мен жергілікті кәсіпорындардың көмегімен ауылдық округтер мен елді мекендер аумағына 1,5 мыңнан астам ағаш отырғызылды, – деді Абай Бірахметов.

Мұндай шаралар өңірдің экологиялық ахуалын жақсартуға, тұрғындардың табиғатқа деген жауапкершілігін арттыруға сеп болмақ.

Шұға ҚОҢҚАБАЙ